सभापती मनोगत..

आपल्या चांदवड कृषि उत्पन्न बाजार समितीचा सन 2023-24 या वर्षाचा वार्षिक अहवाल सादर करतांना मला आनंद होत आहे. बाजार समितीचे विद्यमान संचालक मंडळाने दि.23/05/2023 रोजी माझी सभापती म्हणुन बिनविरोध निवड करुन माझ्यावर जबाबदारी सोपविली आहे.

त्यानुसार दि.23/05/2023 पासुन मी सभापती म्हणुन बाजार समितीचे कामकाज सुरु केले असुन बाजार समितीची, शेतक-यांची व बाजार घटकांची प्रगती व्हावी, या एकमेव उद्देशाने मी व माझे सहकारी प्रामाणिक प्रयत्न करीत आहोत. शेतकरी हित नजरेसमोर ठेवत शेतक-यांच्या विकासाच्या दृष्टीने शेतकरी आपला शेतीमाल बाजार समितीमध्ये विक्रीसाठी घेऊन आल्यानंतर प्रथम येईल त्या प्राधान्याने त्याच दिवशी लिलाव, चोख वजनमाप व तात्काळ रोख रक्कम घेऊन घरी जाता यावे, या पद्धतीने कामकाज सुरु आहे. यात व्यापारी वर्गाचा देखील महत्वाचा सहभाग असुन दैनंदिन माल विक्रीनंतर व्यापारी वर्गामार्फत माल विक्रेत्यांना तात्काळ रोख स्वरुपात रक्कम अदा केली जाते. त्यामुळे तालुक्यातील, तालुक्याबाहेरील, तसेच जिल्ह्याबाहेरील शेतकरी चांदवड बाजार समितीत शेतीमाल विक्रीस प्रथम पसंती देत आहेत. त्यामुळे बाजार समितीचा 17 वा वार्षिक अहवाल सादर करतांना आनंद होत आहे.

तसेच बाजार समितीचे चांदवड मुख्य बाजार आवारात कांदा व भाजीपाल्याचे दैनंदिन लिलाव सुरु असुन भुसार शेतीमालाचे हंगामी लिलाव केले जातात. वडनेरभैरव येथे दैनंदिन भाजीपाला लिलाव सुरु आहे. नविन संचालक मंडळ कार्यान्वित झालेनंतर आम्ही वडाळीभोई येथे मुंबई-आग्रा महामार्गावर यश पेट्रोलपंपासमोर टोमॅटो व भाजीपाला शेतीमालाचे लिलाव सुरु केलेले आहेत.

• पर्यावरण संवर्धनाच्या दृष्टीने व बाजार घटकांना सावलीची सोय व्हावी याकरीता चांदवड येथे अंतर्गत रस्त्याच्या दुतर्फा वृक्षारोपण करण्यात आले आहे.
• बाजार समितीचे आवाराची नियमित साफसफाई केली जाते.
• बाजार समितीचे मुख्य बाजार आवारावर बाजार घटकांसाठी शुद्ध पिण्याच्या पाण्याची सुविधा करण्यात आली.
• सुरक्षिततेच्या दृष्टीने बाजार आवारात सी.सी.टी.व्ही कॅमेरे बसविण्यात आलेले आहेत.
• बाजार समितीचे दैनंदिन कामकाजासाठी संगणक प्रणाली खरेदी केलेली असुन त्या अंतर्गत गेटपास व काटापट्टीचे कामकाज सुरु केलेले आहे. ज्यामुळे शेतीमाल विक्री व्यवस्थेत पारदर्शकता येऊन बाजार समितीतील आवक, बाजारभाव, किती शेतीमालाचे लिलाव झाले, किती बाकी आहेत, याबाबतची माहिती संकेतस्थळावर मिळु शकणार आहे. तसेच शेतक-यांनी बाजार समितीत किती शेतीमाल विक्री केला याबाबतची माहिती ॲपद्वारे उपलब्ध होणार आहे.
• मुख्य बाजार आवार चांदवड येथे शेतकरी व बाजार घटकांसाठी 1000 लि. क्षमतेचे शुद्ध पिण्याच्या पाण्याचे आर.ओ.फिल्टर प्लॅनट बसविण्यात आलेला आहे.
• मुख्य बाजार आवारावर सेलहॉलमध्ये दैनंदिन भाजीपाला लिलाव केले जातात. सदरचे सेलहॉल जुने झाल्याने व मागील वर्षात वादळी पावसामुळे सेलहॉलचे पत्रे आणि पन्हाळ्या खराब झाल्याने शेतीमालाचे नुकसान होऊ नये याकरीता सेलहॉल दुरुस्तीचे काम सुरु आहे.
• शेतकरी निवासात शेतकरी बांधवांसाठी राहण्याची वातानुकुलित व्यवस्था (AC) व आंघोळीसाठी गरम पाण्याची व्यवस्था करण्यात येणार आहे.
• बाजार घटकांसाठी व आरोग्याच्या दृष्टीने बाजार समितीतील मुख्य गेटजवळील स्वच्छतागृह अद्यावत करण्यात येणार आहे. तसेच पश्चिम हद्दीत स्वच्छतागृहाची व्यवस्था करण्यात येणार आहे.
• मुख्य बाजार आवारात पश्चिम बाजुस बाजार घटकांसाठी पाण्याची टाकी बांधकाम करण्यात येणार आहे.
• मुख्य बाजार आवार, चांदवड येथील आवारातील अंतर्गत रस्त्याचे व प्रवेशद्वारालगतच्या दर्शनी भागाचे कॉक्रीटीकरणाचे काम सुरु आहे.
• मुख्य कार्यालयासमोरील स्वच्छतागृहापासुन ते दक्षिण हद्दीपर्यंत ड्रेनेजलाईनचे काम सुरु आहे.
• बाजार समितीचे विद्युत खर्चात बचत होण्याकरीता कार्यालयीन इमारतीवर 15 केव्हीए सौर उर्जा प्रकल्प उभारणीचे काम सुरु आहे.

वरीलप्रमाणे विविध विकास कामांचे नियोजन केलेले असुन सदर कामांना सुरुवात झालेली आहे. तसेच 1) मुख्य बाजार आवार, चांदवड येथे गट नं. 617/1/1 ब मध्ये कांदा लिलावासाठी सेलहॉलचे बांधकाम करणे व उपबाजार आवार, वडाळीभोई येथे नविन 34 गाळे बांधकाम करणे ही कामे मंजुर असुन निविदा प्रक्रिया सुरु आहे.

• बाजार समितीस एच.पी. कंपनीचा पेट्रोल पंप मंजुर असुन मुख्य बाजार आवारात पेट्रोल पंप उभारणीचे कामास लवकरच सुरुवात होणार आहे.
• चांदवड बाजार समितीत शेतक-यांना माफक दरात माती-पाणी परिक्षणासाठी प्रयोगशाळा उभारणी केलेली आहे. शेतकरी बांधवांनी माती-पाणी परिक्षण नमुने सादर केल्यास अल्प दरात परिक्षण करण्यात येईल.

बाजार समितीचे व्यावहारिक दृष्टीकोन समोर ठेवून व शेतकरी हितास प्राधान्य देऊन शेतकरी, व्यापारी व कामगार यांना केंद्रबिंदु मानुन त्यांना बाजार आवारात आवश्यक त्या सोयी-सुविधा उपलब्ध करुन देण्याचे संचालक मंडळाने नियोजन व निर्धार केलेला आहे. बाजार समितीचे कामकाज अधिक सक्षम व पारदर्शी करण्याचा आमचा प्रामाणिक प्रयत्न आहे. सर्व सहकारी संचालक मंडळ, शेतकरी, व्यापारी, मापारी, हमाल, सभासद, सेवक वर्ग व अन्य सर्व हितचिंतक, तसेच विविध क्षेत्रातील राजकिय पदाधिकारी, विविध संस्थांचे पदाधिकारी, जेष्ठ नेते, पत्रकार बंधु, विविध खात्याचे अधिकारी आदिंचे सहकार्य लाभत आहे. भविष्यात देखील आपणा सर्वांचे असेच अनमोल सहकार्य मिळेल, अशी अपेक्षा व्यक्त करतो व सर्वांचे सहकार्याबद्दल आभार मानुन माझे मनोगत पुर्ण करतो.

नितीन रघुनाथ आहेर

सभापती

कृषि उत्पन्न बाजार समिती चांदवड

ता. चांदवड जि. नाशिक